БИШКЕК, 10-мар. — Sputnik. Түркиянын президенти Режеп Тайип Эрдоган өлкөнүн Конституциялык соту тыңчылыкка шектелип жаткан эки журналисти коё берүү боюнча чечим кабыл алуу укугу жок экенин билдирди.
Оппозициялык гезиттин башкы редактору Жан Дүндар жана басылманын Анкарадагы өкүлү Эрдем Гүл 2015-жылы 26-ноябрда камакка алынган. Стамбулдун прокуратурасы Дүндар менен Гүлдү тыңчылыкка шектеп, өмүр бою абакка кесүүнү суранган. Бирок, Түркиянын Конституциялык соту журналисттердин камалышы алардын укугун бузуу болуп саналарын белгилеп, соттун чечими чыкканга чейин аларды бошоткон. Эрдоган соттун мындай өкүмүн кабыл албай тургандыгын жана аны сыйлабарын билдирип, журналисттер иликтөө эмес тыңчылык кылып жүргөн деген пикирин айткан.
"Мен бул чечим эмнеге таянып кабыл алынганын окуй элекмин. Болгону документ жарыяланганын уктум. Балким аларга мындай түшүндүрмө жазууга оор болгон окшойт. Албетте конституциянын аткарылышын көзөмөлдөп туруу бул менин милдетим. Бирок, Конституциялык сот жеке кайрылууну карап жатканда соттун чечимин күтүшү керек. Бирок ал өзүн биринчи сот инстанциясынын ордуна коюп, чечим кабыл алган. Ал мындайды кsлбашы керек болчу", — деген пикирин Эрдоган Украинанын президенти Петр Порошенко менен болгон маалымат жыйынында билдирди.
Cumhuriyet гезити жүк ташуучу унааларды текшерүү учурунда тартылган фото видеону 2015-жылы май айында жарыялашкан. Анда жүк ташуучу унаалардын ичинен курал жарактар – артиллериялык снаряддар, мина жана башкалар бар экени даана көрсөтүлгөн. Маалымат чыккандан кийин Эрдоган басылмага жана башкы редакторго карата кылмыш ишин ачуу боюнча прокуратурага кайрылган.
