Миңдеген мык жана 20 чакырым жип. Студенттер желек күнүнө карата туу жасашты

БИШКЕК, 25-фев. — Sputnik. Бишкектеги жогорку окуу жайлардын үч студенти – Айгерим Жумалиева, Айжамал Шамыратова жана Заман Турсунбеков желек күнүнө карата String art ыкмасы менен Кыргызстандын туусун жасашууда.

Жаш художниктер буга чейин масштабдуу эмгектерди жасасак деп кыялданып келишкен. "Тарых жана маданият" жылынын урматына алар узуну 2,44 метр жана туурасы 1,52 метр келген желекти өзгөчө ыкмада жасоону чечишкен.

"Буга чейин String art ыкмасы менен майда иштерди жасап келгенбиз. 2016-жылды президентибиз "Тарых жана маданият" жылы деп жарыялагандыктан биз да өзгөчө бир нерсе жасагыбыз келди. Ошентип желекти жасоону чечтик", — дейт Турсунбеков.

Ал желекти жөн жерден тандап алышпаганын айтат. Себеби, жаштар жана орто муун менен улуу муундагылар деле желектин тарыхын билишпейт. Аларга мамлекеттик атрибут болгон желектин тарыхын эстетип, аны дайыма илип жүрүүсү үчүн ушундай ишти башташкан. Андан сырткары административдик имараттарда түрдүү желектер илингендиктен баштапкы эскиз боюнча желек кандай болуусу керектигин башкаларга көрсөтүп, желекти да туура тандоону жеткиргилери келгенин кошумчалады.

"Биз байкап көрсөк көпчүлүк жерде, анын ичинде административдик имараттарда түрдүүчө жасалган желектер илинет экен. Ар ким өзү каалагандай жасайт экен", — дейт ал. 

Өзгөчө ыкма менен жасалган желек Бишкектеги соода борборлорунун бирине көргөзмөгө коюлат. Андан соң 3-мартта Каба уулу Кожомкул атындагы спорт сарайында аукциондо сатылат. Аукционго ишкерлер жана башка кишилер чакырылган. Иш чаранын уюштуруучуларынын бири Мээрим Абдрахманова аукциондон түшкөн каражат Токмок шаарындагы балдар үйүн оңдоого жумшаларын айтат.

String art ыкмасы менен жасалган желектин баштапкы баасы миң доллар.