БИШКЕК, 25-фев. — Sputnik. DOXA арт-группасы кирпич дубалга болгарка менен кесилип жасаган сүрөттү тартуулады.
Арт-студиянын адистери Сүймөнкул Чокморовдун жаңы сүрөтүн Facebook тармагындагы баракчасына жайгаштырышкан.
Sputnik Кыргызстан агенттиги менен маектешип жатып долбоор катышуучусунун бири Дмитрий Петровский бул сүрөттү алар төрт күн ичинде жасашканын айтып берди.
"Жаңы курулган имараттын дубалдарынын ички бетине сүрөт тартып берүүбүздү өтүнүштү. Биз жаңы техника болгон сүрөттөрдү кесип жасоону сунуштадык. Бул жерде белгилүү актер жана сүрөтчү Сүймөнкул Чокморовдун элесин түшүрүүнү туура көрдүк", — дейт Петровский.
Ал аталган жаңылык жакын арада шаардын башка көрүнүктүү жайларында да пайдалана турганына ишеним артат.
"Балким, кайсы бир көчөгө асымы берилген инсандын сүрөтүн чегербиз. Азырынча конкреттүү пландарыбыз жок", — дейт долбоордун мүчөсү.
DOXA арт-группасы төрт жыл мурун негизделип, көп кабаттуу үйлөрдүн маңдайына, дубалдарына сүрөт тартып келет. Топ Боом капчыгайындагы тарткан чуулгандуу сүрөтү менен аты чыккан. Бул сүрөткө жарандык активисттер каршы пикирин билдирип келишет.
