БИШКЕК, 22-фев. — Sputnik. "Дордой" базарында ишкерлерди тейлөө боюнча экинчи сервистик-тейлөө борбору ачылганын Мамлекеттик салык кызматы билдирди.
Эскерте кетсек, 2014-жылдын аягында аталган базарда ишкерлерди тейлөө боюнча биринчи сервистик борбор ачылып, анда болжол менен базарда иштеген 10-12 миңдей ишкер тейленген.
Бирок базардын башка тарабында иштеген ишкерлерге МСКнын жалгыз борборуна баруу кыйынчылык туудургандыктан, тейлөө борборун кеңейтүү жөнүндө маселеси жаралган.
"Буга байланыштуу базардын башка тарабына ишкерлерди тейлөө боюнча дагы бир борборун ачуу чечими чыккан", — деди борбордун ачылыш аземинде МСКнын төрагасынын орун басары Октябрь Абдыкаимов.
Сервистик борборду ачуу ЮСАИД долбоорунун финансылык жана техникалык колдоосунун алкагында мүмкүн болду.
Мындан сырткары, МСКнын www.sti.gov.kg сайтында "Дордой" жана "Кара-Суу" базарлары боюнча атайын бөлүм иштеп жатканын белгилейт. Ар бир каалоочу аталган базарларда төлөнгөн салыктар, анын ичинде салык салынуучу контейнерлердин саны боюнча толугу менен он-лайн маалымат алуу мүмкүнчүлүгүнө ээ.
