БИШКЕК, 19-фев. — Sputnik. Атайын рейд учурунда Нарын шаарында Ысык-Көл облусунан кулчулуктан качып келген 21-22 жаштагы Урмат аттуу бала кармалганын Нарын облустук ички иштер башкармалыгынын кылмыш иликтөө бөлүмүнүн жетекчиси Бакыт Сыдыкбеков Sputnik Кыргызстан маалымат агенттигине билдирди.
Анын айтымында, 15-16-февралда өткөрүлгөн "Селсаяк" рейди учурунда автобекеттен 22 жаштар чамасындагы бала кармалган.
"Баланы автобекетте жүргөн жеринен кармадык. Анын жанында ким экенин аныктай турчу документтер жок экен. Өзүнүн айтуусу боюнча Ысык-Көл облусундагы жайлоодо көп жылдан бери мал багып жүргөн. Жайлоодон качып Нарын шаарына келгенине бир күн болуптур. Андан ары Бишкекке кетүүнү пландаган", — дейт ал.
Сыдыкбеков ошондой эле, жайлоодон качып келген Урматты малчылар жолдон курсагын тойгузуп, Нарынга кеткен машинага салып жиберишкенин кошумчалады.
Учурда бала Ысык-Көл облусунун Тоң райондук ички иштер бөлүмүнө өткөрүлүп берилди. Аталган райондун ИИБ башчысы Айтбек Шаменов баланын туугандары жана окуянын чоо-жайы иликтенип жатканын Sputnik Кыргызстанга билдирди.
