БИШКЕК, 11-фев. — Sputnik. Шаардык муниципалитет бюджетке кылчактабай күнүмдүк көйгөйлөрдү чечүүгө жөндөмдүү экенин экс-мэр Кубанычбек Кулматов маалымат жыйында билдирди.
Кулматовдун айтымында, учурда көйгөйлөр программалардын негизинде чечилип жатат. Эгер былтыр президенттин чечимине ылайык жолдордун ремонтуна 1 миллиард сом бөлүнсө, быйыл шаардык казынадан 600 миллион сом бөлүнгөн.
"Жарыктандыруу, транспорт, таштанды чыгаруу жана жол сыяктуу негизги маселелер комплекстүү чечилет. Мисалы, азыр бардык электр карагайлары менен жарык берүүчү аспаптар алмаштырылып жатат", — деди экс-мэр.
Коомдук унаа боюнча программа ишке аша баштаганын белгилеп, Кулматов таштанды чыгарууга "Тазалык" ишканасынын кызматкерлери кызыкдар болуп калганын айтты.
Шаардын мурунку башчысы мэрия акча таап, өз көйгөйлөрүн чечүүгө жөндөмдүү экенин баса белгиледи.
