БИШКЕК, 30-янв. — Sputnik. Режиссер Актан Арым Кубаттын "Кентавр" тасмасын тарткан топ 2015-жылдын мыкты тобу деп табылды. Бул тууралуу Кинематография департаментинин жыл жыйынтыгын чыгаруучу коллегия жыйынында белгилүү болду.
Буга чейин Кыргызстан, Франция, Германия жана Нидерланды мамлекеттеринин биргелешкен аракетинен жаралган тасма эл назарына эмдиги жылы тартууланары айтылган.
Кинематографты колдоо фондусунун маалыматы боюнча тасманын алгачкы монтаж иштери Сербиянын борбору Белград шаарында, андан кийин Германиянын Берлин калаасында өтөт.
"Кентавр" тасмасында башкы ролду режиссер Актан Арым Кубат өзү жараткан. Андан тышкары Таалайкан Абазова, Болот Тентимишов, Зарема Асаналиева, Илим Калмуратов, Нурали Турсункожоев, Максат Мамырканов тартылган.
Тасманын премьерасы Канн фестивалында өтөрү болжолдонуп жатат.
