БИШКЕК, 15-янв. — Sputnik. Бишкекте ЕАЭБ алкагында тигүү тармагынын көйгөйүнө арналган экономикалык форум өтө турганын Экономика жана өнөр жай министрлиги билдирди.
Маалыматка ылайык, иш-чараны үстүбүздөгү жылдын 18-январында аталган министрлик бизнес ассоциацияларынын өкүлдөрү менен биргеликте өткөрмөкчү.
"Форумда текстиль жана тигүү тармагынын учурдагы абалы, көйгөйү, өнүктүрүү жолдору талкууланат. Мындан тышкары, мурунку Ал-Суу заводунун ордуна текстилдик фабрика куруу боюнча макулдашууга кол коюлат. Фабрика 50 миллион долларлык импорттун ордун жабууга жөндөмдүү болот", — деп айтылат билдирүүдө.
Министрлик текстиль фабрикасынын курулушу Кыргызстандын тигүү тармагын жеткиликтүү сырье менен камсыздай турганын, бул өз кезегинде экспорттук потенциалды жогорулатууга өбөлгө болорун белгилейт.
