БИШКЕК, 14-янв. — Sputnik. Жаңы жыл алдында 29-декабрда 25 жаштагы Бишкек шаарынын тургунун машинага күч колдонуп салып кетип, аны сабап акча талап кылган кылмышкерлер кармалды. Бул тууралуу шаардык милициядан билдиришти.
Маалыматка ылайык, 25 жаштагы тургунду белгисиз кишилер күмүш түстүү "Субару Импреза" автоунаасына салып, Чүй облусунун Беш-Күнгө айылына алып барышкан. Аны үч сааттай кармап, ур-токмокко алып акча талап кылышкан.
Кылмышкерлердин бирөө жаран менен тааныш болгон. Ал кылмышкерлердин бирөөсүнөн авариялык абалдагы "Гольф 3" машинасын сатып алган. Кылмышкерлер жарандан машинаны сатканда карыз болуп калгансың деп 25 миң сом бересиң деп кыйнашып, 17 миң сом алган соң кое беришкен.
Колго түшкөндөргө карата Бишкек ШИИБдин тергөө башкармалыгы Кылмыш жаза кодексинин 125-беренеси (кишини мыйзамсыз эркинен ажыратуу) жана 170-беренеси (опузалоо) боюнча кылмыш иши козголду.
Бул ишке шектүү делип, 25, 29 жана 32 жаштагы жарандар кармалды.
