БИШКЕК, 14-янв. — Sputnik. Кызматтык абалынан кыянаттык менен пайдаланып, маңзаттарды сатып келген Кыргызстандын Юстиция министрлигинин алдындагы соттук экспертизалардын мамлекеттик борборунун эксперти Николай Иксанов 16 жылга кесилди. Бул тууралуу Жогорку соттун маалымат кызматы билдирди.
Соттолгон Иксанов Юстиция министрлигинин алдындагы соттук экспертизалардын мамлекеттик борборунун эксперти болуп иштеп турганда сот жана тергөө органдарынан экспертизага келген маңзаттарды башка жактарга саткан.
Тактап айтканда, 2015-жылы 17-июнда Токтогул жана Эркиндик гүл багынан бир жаран кармалып, анын жанынан 37,5 грамм нашаа табылган. Ал аны Иксановдон мыйзамсыз түрдө жети миң сомго сатып алганы аныкталган. Ушул эле күнү Маңзаттарды мыйзамсыз сатууга каршы күрөшүү башкармалыгынын кызматкерлери Иксановдун иш бөлмөсүнө барганда ал өз ыктыяры менен жети миң сомду, эки килограммга жакын героинди, 900 граммдай нашааны катып койгон жеринен алып чыгып берген.
