БИШКЕК, 1-янв. — Sputnik. 2016-жыл тарыхый маанилүү окуяларга бай боло турганын Темир Сариев билдиргенин өкмөттүн маалымат кызматы маалымдады.
Жаңырган жыл Кыргызтанда Маданият жана тарых жылы деп жарыяланган. Премьер-министр 2015-жылы өкмөт баштаган маанилүү долбоорлор улантыларын белгиледи.
"Биз маданиятты колдоо жана аны өнүктүрүүгө өзгөчө көңүл бурабыз. Анын ичинде улуттук маданияттын үлгүлөрүн жайылтууга басым жасалат. Учурдагы коопсуздук маселелери күчөп, терроризм жана экстремизм сыяктуу терс көрүнүштөргө маданиятты өнүктүрүү менен каршы тура алабыз", – деди Темир Сариев.
Сариев 2016-жылы улуттук экономиканы чыңдоо, өнөр жай жана инфраструктуралык долбоорлорду ишке ашыруу жаатында маанилүү иштер турганын, бул үчүн өкмөт талбай иштөөгө тийиш экенин эскертти.
