БИШКЕК, 28-дек. — Sputnik. Октон жабыркаган Улуттук гвардиянын аскер кызматкеринин абалы оор экенин Бишкек улуттук травматология жана ортопедия борборунун жетекчиси Сабырбек Жумабеков билдирди.
Жумабеков эки жоокер ооруканага таңкы 5.20да түшкөнүн айтты. Ок бирөөсүнүн ичине тийип, ички органдарын жаратпай салган. Ал операция учурунда көз жумган.
Экинчи жоокердин өпкөсү, ийни жана ич жагы жабыркаганы белгилүү болду. Ага учурда операция жасалып, өпкө менен ичеги-карындын ортосунда калган ок алынган эмес.
"Жоокер азыр дарылардан кийин уктап жатат. Окту алган жокпуз. Аны кийин деле алып коюуга болот", — деди Жумабеков.
Кырсыктын расмий себептери азырынча айтыла элек. Айрым маалымат каражаттарынын билдирүүсү боюнча, окуя жабыркагандардын бири кароолдо турган жоокерге асылып, экинчиси аларды арачалап жатканда болгон.
