БИШКЕК, 28-дек. — Sputnik. Жыл башынан бери күз-кыш мезгилине даярдык иштерине республикалык бюджеттен 5 миллиард сом бөлүнгөнүн Каржы министрлиги билдирди.
Бул каражатка бир тоннасы 4 миң сомго бааланган Кара-Кеченин 1 миллион 225 миң тонна көмүрүн сатып алууга болот.
Аталган суммадан электр энергиясы үчүн 1,722 миллиард сом, анын ичинен 1 миллиард 617,2 миллион сом "Кыргызжилкоммунсоюз" мамлекеттик ишканасына жана 105 миллион сом Ош шаарына бөлүнгөн.
Бюджеттик уюмдардын жылуулук, электр энергиясы жана жаратылыш газына болгон чыгымына 1,106 миллиард сом каралган. Анын 707 миллиону электр энергиясына, 309 миллиону жылуулук үчүн, ал эми 8,4 миллиону газга төлөнгөн.
Көмүр алууга жалпы жонунан 209,4 миллион сом каралган. Мындан тышкары, бийик тоолуу, алыскы аймактарда жашагандар үчүн 120,3 миллион сом бөлүнгөн.
