БИШКЕК, 20-дек. — Sputnik. Кыргызстандын футбол индустриясындагы мыктылар аныкталганын Футбол федерациясы билдирди.
Маалыматка ылайык, жылдын мыкты оюнчусу болуп Кыргызстандын улуттук командасынын жана сербиялык "Раднички НИШ" клубунун оюнчусу Антон Землянухин табылды. Ал бул номинацияда өзүнүн командадагы өнөктөштөрү коргоочу Азамат Байматов менен дарбазачы Павел Матяштан ат чабым озуп кетти.
Айымдардын арасынан мыкты футболчу болуп олимпиада резервинин балдар жана өспүрүмдөрдүн республикалык борборунун оюнчусу Айжан Боронбекова аныкталды. Бул наамга Назгүл Калдыбаева ("Каракол") жана Ангелина Майер ("Абдыш-Ата") да ат салышкан.
Улуттук команданы жетектеп келген Александр Крестинин жылдын мыкты машыктыруучусу болду. Крестининден тышкары, бул номинацияга U-16 командасынын жетекчиси Самат Сүймалиев менен Оштун "Алай" клубунун насаатчысы Андрей Власичев талапкер болгон.
"Жылдын рефериси" наамы ФИФА арбитри Тимур Файзуллинге ыйгарылып, кийинки жылдан тарта эл аралык оюндарды тескөөгө укук берилди. Файзуллин жакында эле өз квалификациясын тастыктаган.
Мындан тышкары, Кыргызстандын Кубогун жеңип алган "Абдыш-Ата" клубунун башкы машыктыруучусу Мирлан Эшеновго жана Топ-лиганын чемпиону болгон "Алайдын" жетекчилигине сыйлыктар тапшырылды.
Футбол федерациянын иш-чараларын жана оюндарды уюштурууга көмөк көрсөткөн ишкер Бермет Төлөгөнөва Жылдын өнөктөшү болуп табылды.
