БИШКЕК, 16-дек. — Sputnik. Борбордук шайлоо комиссиясынын мүчөлөрү жыйында "Республика — Ата-Журт" партиясынан депутат болуп келген Жыргалбек Саматовду мандатынан ажыратуу чечимин кабыл алганын Sputnik агенттигине БШК билдирди. Мандат кайрадан Болотбек Ибраимжановго берилди.
Үстүбүздөгү жылдын 7-декабрында Саматов сотто БШКнын үстүнөн жеңишке жетишкенден кийин комиссия ага депутаттык күбөлүк менен төш белги тапшырган.
Бишкектин Биринчи Май райондук соту талапкердин доо арызын карап, БШК Саматовду депутат катары каттоо боюнча маселени негизсиз карабай жатканын айткан.
Sputnik агенттигинин маектеши БШК Саматов боюнча 7-декабрдагы токтому менен чечимин жокко чыгарууну чечкен.
БШК Мамлекеттик миграциялык кызматка кайрылып, Федералдык миграциялык кызматынан 2015-жылдын 2-ноябрында берилген каттын чоо-жайын билип берүүсүн өтүнгөн.
"Аталган катта Жыргалбек Саматов Россиянын жарандыгынан баш тарткандыгы үчүн аталган мамлекеттин жараны болуп эсептелбей турганы айтылган. ФМК мындай кат аларда жок экенин, бул жөнүндө эч кандай жооп жазылбаганын билдирген", — дейт БШК.
Дал ушул себептен комиссия 7-декабрдагы чечимин жокко чыгарып, "РАЖ" партиясынын Саматовго мандат бербөө жөнүндөгү доосун канааттандырууну чечкен.
"Республика — Ата-Журт" партиясынан депутат болуп келген Саматов менен болгон жаңжал саясий уюм анын россиялык жаран экенин айтып чыккандан тартып башталган. Талапкер мындай дооматты четке кагып, сотко кайрылганы белгилүү. Партиянын тизмеси боюнча (№17) Саматов парламентке келмек. Анын ордун башка талапкер — Болотбек Ибраимжанов ээледи.
Кыргызстанда 4-октябрь күнү парламенттик шайлоо өтүп, натыйжада КСДП, "Республика — Ата-Журт", "Кыргызстан", "Өнүгүү — Прогресс", "Бир Бол" жана "Ата Мекен" партиялары жеңишке жетишкен.
