БИШКЕК, 16-дек. — Sputnik. Кыргыз-орус өнүктүрүү фондунун атынан 705 миллион сомдук 63 долбоорго ачка бөлүнгөнүн аталган фонд билдирди.
Бүгүнкү күнгө карата насыя алуу боюнча "Айыл Банк" жана "РСК Банктарына" 293 маалымдама келип, анын жалпы суммасы төрт миллиард сомдон ашкан.
"Көңүл чордонунда алыскы аймактардагы ишканалар турат. Жалпы маалымдаманын 55,6 пайызы Чүй облусунан, 20,6 пайызы Ош жана Жалал-Абад облустарынан, 9,5 пайызы Ысык-Көл жана калган бөлүгү Талас, Баткен жана Нарын облустарынан келип түшкөн", — дейт фонддун төрайымы Нурсулуу Ахметова.
Сентябрь айында Кыргыз-орус өнүктүрүү фонду чакан жана орто бизнести даректүү каржылоо программасын ишке ашыруу максатында "Айыл Банк" жана "РСК Банк" менен келишим түзүп, эки банкка 1,2 миллиард сом бөлүп берген. Аталган программанын алкагында ишкерлерге беш жылдык мөөнөткө 12 пайыздык үстөк менен жеңилдетилген насыя алууга мүмкүнчүлүк берилет.
