БИШКЕК, 13-дек. — Sputnik. Бишкек шаарынын борбордук "Ала-Тоо" аянтында жаңы жылдык балатыны орнотуу башталганын Sputnik агенттигинин кабарчысы жеринен билдирди.
Буга чейин маалымдалгандай жаңы жылдык балаты Кытайдан алынып келмек. Бул балаты мурдагыларга караганда жазы жана бийик болот. Бирок, жасалма болгондуктан бир жуманын ары-бери жагында куралып бүтөт.
"Жасалма балатынын бийиктиги 25 метрге жетет. Ага дароо эле гирлянддар жана башка күйүп туруучу оюнчуктар илинет", — деп мэриядан билдиришти.
Майрамга карата борбордук аянтты шөкөттөө иштери жүрүп жатат. Ал эми өлкөнүн башкы балатысы 19-декабрда күйүзүлөт. Учурда Токтогул Сатылганов атындагы улуттук филармониянын жана Абдылас Малдыбаев атындагы опера жана балет театрынын алдына балатылары коюлган.
