Азыр Кыргызстандан аймагынан боз үй формасында сувенирлерден тарта, салынган ири курулуштарга чейин тапса болот. Мындай курулуштар боз үйдүн канчалык ыңгайлуу экенин дагы бир жолу тастыктап, бир жагынан көчмөн турмушту эске салып тургансыйт.
Боз үйдү бир гана Кыргызстанда эмес, чет жакта дагы эс алуу өргөсү катары колдонгондор бар.
Үч кабаттуу боз үй
Бул боз үйдү биринчи жолу 1995-жылы Манастын 1000 жылдык мааракесинде тигишкен. Ал көпчүлүктүн көңүлүн буруп, чоң кызыгууну жараткан. Бүгүнкү күнү ал Ош шаарынын "Сулайман-Тоо" этнографиялык комплексинин алдында тигилип, Алымбек датканын музейи катары колдонулуп келет. Бул — шаарга келген коноктор менен туристтер сөзсүз кирип, тааныша турган Ош шаарынын өзгөчөлүктөрүнүн бири.
Боз үй формасында салынган курулуштар
Борбор калаадан мындай курулуштарды табуу кыйынга деле турбайт. Ошентсе да алардын ичинен өзүнүн көлөмү жана жасалгасы менен башкалардын көңүлүн бургандары жок эмес. Мисалы Бишкектин түштүк-чыгыш тарабында орун алган эс алуу борборлору.
Ошондой эле Чуңкурчак жайлоосунда да заманбап боз үйлөрдү кездештирүүгө болот.
Андан сырткары Ысык-Көл облусунун Жети-Өгүз районунун Саруу айылынан 20 чакырым жогору жактагы Жууку деп аталган жерден минералдык суу чыгат. Дал ошол жерди боз үй формасында тосуп коюшкан. (фото)
Англиядагы ээсине акча алып келген боз үй
Англиялык Тоби Файрлов өз өлкөсү үчүн адаттан тышкаркы болгон ишкердик менен алектенгенине 20 жылдан ашты. Ал ар кандай фестиваль, салтанаттар жана үйлөнүү үлпөттөрү үчүн кыргыздын кадимки боз үйүн ижарага берет.
Файрловдун айтымында мындай ишкерлик менен алектенгендердин эң алгачкыларынан. Боз үйдү Девон шаарында гана эмес, бүтүндөй Англия боюнча ижарага алып кетишет. Учурда анда түрдүү көлөмдөгү 15 кыргыз үйү бар.
Сувенир боз үйлөр
Албетте боз үй формасындагы сувенирлерди жасоо да жолго коюлган. Мындай боз үйлөрдү чет жактан келген туристтерге Кыргызстандан эстелик катары беришери жана алар сатып алары турган иш. Жакында чоң боз үйдүн кичирейтилген формасындагы чакан боз үйлөр да чыкты. Анын кадимкидей, кереге-ууктары менен бирге бардык жасалгасы бар.
Андан сырткары боз үй формасындагы аялдамаларды Кыргызстандын айрым аймактарынан кездештирүүгө болот. Мындай аялдамалар Совет доорунда салынган.
