Адамда кездешкен оорулардын 60%ы ветеринария тармагына байланыштуу
15:04 04.11.2026 (Жаңыртылды: 16:16 04.11.2026)
© Sputnik / Асел Сыдыкова
Жазылуу
Адамдар арасында кездешкен оорулардын 60 пайызы ветеринария тармагына байланыштуу. Бул тууралуу “Ачык кеп” уктуруусунда Суу ресурстары, айыл чарба жана кайра иштетүү өнөр жайы министрлигине караштуу Ветеринардык жана фитосанитардык көзөмөл боюнча кызматтын директорунун орун басары Кумар Исаков билдирди.
Анын айтымында, адамдын саламаттыгы, азык-түлүк коопсуздугуна байланышкан бизнеске мораторий болбошу керек.
Исаков: адамдар арасында кездешкен оорулардын 60 пайызы ветеринария тармагына байланыштуу
“Кыргызстандын калкынын 70 пайызы айыл чарба тармагында эмгектенет. Паразиттик, бактериялык жана вирустук оорулардын очоктору айыл чарба тармагында болушу мүмкүн. Ошондуктан тамак-аш коопсуздугун камсыз кылуу жана жугуштуу ооруларды алдын алуу негизги милдеттердин бири. Кыргызстанда ишкерлерди текшерүүгө коюлган мораторий жарым-жартылай алынды. Менимче, адамдын саламаттыгы, азык-түлүк коопсуздугуна байланышкан бизнеске мораторий болбошу керек. Учурда кызматтын адистери коомдук тамактануучу жайларга, мал союучу жайларга, мал базар, ветеринардык аптека жана эт саткан түйүндөргө мониторинг жүргүзүп жатат. Бул чаралар жугуштуу оорулардын жайылышын жана тамак-аштан массалык уулануу учурларын алдын алууга багытталган. Текшерүүдө объектилердин санитардык абалына, ветеринардык документтерине жана мыйзамда белгиленген талаптардын сакталышына көңүл бурулууда. Учурда Кыргызстанда заманбап стандарттарга жооп берген 8 муниципалдык мал базар ачылды. Ал эми Евразия экономикалык биримдигинин талаптарына толук жооп берген жана анын бирдиктүү реестрине катталган 11 мал союучу жай иштейт. Бул чоң жетишкендик”, — деди Исаков.
Ал ветеринардык жана фитосанитардык нормаларды, ошондой эле азык-түлүк коопсуздугунун талаптарын бузган ишкерлерге айып пул салынышы мүмкүн экенин эскертти. Айрым учурларда ишкананын иши убактылуу токтотулушу да ыктымал.
