БИШКЕК, 2-дек. — Sputnik. АКШ мурдагыдай эле Россияга каршы экономикалык санкцияларды киргизүүнү карап жатат. Бул жолу Москва орто жана чакан аралыктагы ракеталарды жок кылуу боюнча келишимди бузганын айтууда. Бул тууралуу АКШнын мамлекеттик катчысынын куралданууну тескөө жана эл аралык коопсуздук боюнча орун басары Роуз Гетемюллер билдирди.
"Биз орто жана чакан аралыктагы ракеталар боюнча экономикалык чараларды кароону улантып жатабыз, бирок учурда чечим кабыл алына элек", — деди Гетемюллер.
Ал ошондой эле, АКШ менен Европа биримдиги Россияга карата экономикалык санкцияларды Украинадагы абал боюнча киргизип, ал "абдан натыйжалуу" болгонун кошумчалады.
Орто жана чакан аралыктагы ракеталар боюнча келишимге АКШ менен Советтер союзунун ортосунда 1987-жылы кол коюлуп, 1988-жылы күчүнө кирген. Тараптар орто (1 миң – 5,5 миң чакырымга чейин) жана чакан (500 – 1 миң чакырым) аралыктагы ракеталарын толугу менен жок кылышы керек болчу. 1991-жылы келишим аткарылып, 2001-жылга чейин эки тарап бир-бирин көзөмөлдөп турган. Ошол эле учурда, калган мамлекеттер, анын ичинде Европадагы өлкөлөр мындай ракеталарды өз куралдуу күчтөрүндө колдонуп келет.
