БИШКЕК, 19-ноя. — Sputnik. Ош шаарындагы ишкер айым Каныкей Козубаева 10 жылдан бери тигүүчүлүк менен алектенет. Ал башында күнүмдүк кийимдерди, мектеп формасын жана дарыгерлердин халатын тиккен. Бирок, алардын кээси өтпөй, чыгым алып келгендиктен акыркы жылдары жалаң улуттук үлгүдөгү кийимдерди тигүүгө өткөн.
"Улуттук үлгүдөгү кийимдер калып калат деп чочулбайт экенсиң. Себеби, этностилдеги кийимдерди бата той, кыз узатуу, үйлөнүү той дегендерге жакшы алышат", — дейт ал.
2014-жылдан баштап Экономика министрлиги тарабынан республика боюнча "Айымдар ишкердүүлүгүн өнүктүрүү" долбоору иштеп келет. Анын негизги максаты ишкер айымдардын финансы кызматына болгон жеткиликтүүлүгүн камсыздоо менен айыл жергеси жана кичи шаарлардагы айымдардын турмуш деңгээлин жогорулатуу болуп саналат.
Эки кыз, эки уулдун энеси учурда өзүнүн чакан цехин жолдошу менен чогуу иштетип келет. Күйөөсү мурда терминалда иштечү. Аны ишинен кыскартып, жумуш жок калганда үй-бүлөлүк чакан бизнеске үй-бүлө баш оту менен киришкен. Азыр жолдошу цехте бычмачынын милдетин аткарат.
Козубаева айымдарга ишкердик менен алектенүү оор экенин өз сөзүндө белгилеп өттү. Себеби, үй-бүлө менен бизнести бирдей алып кетүү чоң тажрыйбаны жана мээнетти талап кылат.
"Чакан бизнести баштаганда бир топ кыйынчылыктар болду. Кайсыл товарды эл көп сатып алат, кандай кездемелерден тигилген кийимдерге суроо-талап көп болорун билүү кыйын экен. Убакыт өткөн сайын ары-бери урунуп атып, тажрыйба топтойт экенсиң. Ишкердикке жаңы киришип аткан кыз-келиндерге эки жакка чыгып, башка жерлерди көргүлө дейт элем. Себеби, көп окуган эмес, көптү көргөн билет деген чын экен", — дейт ишкер айым.
Экономика министрлигинин "Айымдар ишкердүүлүгүн өнүктүрүү" долбоорунун алкагында бүгүнкү күнгө чейин 28ден 65ге чейинки жаш курактагы Кыргызстандын 193 микро-ишкер-айымы окуудан өттү. Алар финансылык сабаттуулук, бизнес-пландоо сыяктуу ыкмаларды үйрөнүшкөн.
