Кыргыздын кийиз буюмдары Японияны багындырууда

БИШКЕК, 11-ноя. — Sputnik. Октябрь айынын аягынан тарта Япониянын ири соода борборлорунда кыргыздын кийизден жасалган буюмдары "Made in Kyrgyzstan" бренди менен сатылып баштады.

Кыргызстандык Тумар Арт-Групп коомунан билдиришкендей, Япония менен 2014-жылдан бери кызматташуу боюнча аракеттер көрүлүп келет. Жетишилген ийгиликтер ошол аракеттердин үзүрү экенин компаниядан кошумчалашты.

Кыргыздын кийизден жасалган буюмдары күн чыгыш өлкөсүндө Tumar Japan деген аталыш менен сатылууда. Мындай аракеттер Кыргызстанды Японияда жакшылап тааныштырууга жакшы өбөлгө түзөт. Андан сырткары колго сапаттуу жасалган буюмдар кардарларды өзүнө тартып, Кыргызстанга болгон кызыгуусун арттырат. 

Буюмдардын дизайны сатылып жаткан мамлекеттердеги жергиликтүү калктын тенденциясын эске алуу менен кыргыздардын көркөм кол өнөрчүлүгүнүн уникалдуулугун чагылдырып жасалат. Кийизден ала-кийиз жана шырдак техникалары менен жасалган буюмдар чет мамлекеттерде чоң кызыгуу менен кабыл алынат. 

Кыргызстандык компаниянын кийизден жасалган буюмдары бир гана Япония эле эмес, Америка Кошмо Штаттарында, Европа өлкөлөрүндө, Россия жана Казакстанда 10 жылдан бери сатылып келет.

Мындан сырткары, Кыргызстанда жасалган кийиз буюмдар Португалия (1998), Германия (2000 г.), Италия жана АКШ мамлекеттериндеги көргөзмөлөргө катышып келет. Быйыл эле АКШдагы New York Now (2015), Японияда Batoma (2015) жана Германия мамлекетиндеги Ambiente (2015) профессионалдуу көргөзмөлөргө катышты.