БИШКЕК, 19-ноя. — Sputnik. Кылдат даярдалган ыкчам операциянын негизинде Бишкекте афган баңги затынын Кыргызстан аркылуу Казакстан менен Россияга кетүүчү жолун мыктап алган жарандар кармалганын Мамлекеттик баңгизатты көзөмөлдөө боюнча агенттиги билдирди.
Маалыматка ылайык, кыргызстандык жарандар шаардын Фрунзе жана Шопоков көчөлөрүнүн кесилишинде кармалган. Текшерүү учурунда 53 жашар адамдын колундагы кара түстөгү баштыктан скотч менен оролгон тогуз таңгак табылган. Анын жанында 37 жаштагы шериги болгон.
Эксперттик-криминалдык кызматтын бүтүмүнө ылайык, табылган 8 килограмм 542 грамм көлөмүндөгү зат апийим экени аныкталды.
Муну менен афган баңги затынын транзиттик жолу буулуп, уюшкан топ чачыратылды. Ал эми апийимдин табылышы боюнча аталган жарандарга карата кылмыш иши козголуп, буга тиешеси бар башка адамдарды аныктоо иш-чаралары жүрүп жатат.
