БИШКЕК, 25-окт. — Sputnik. Дайыр Асанов атындагы Кыргыз Улуттук аскер лицейинин ишмердиги менен таанышкан өкмөт башчы Темир Сариев аскердик тарбиянын мааниси жогору экенин баса белгиледи. Бул тууралуу өкмөттүн маалымат кызматы билдирди.
Ал ошондой эле, өлкөдө аскердик реформа жүргүзүлүп жатканын белгилеп, анын алкагында аскердик билим берүүнүн сапатын көтөрүү боюнча иштер аткарылып жатканын маалымдады.
“Бул лицейде мамлекеттин коопсуздугун жана эгемендигин коргой турган адистер тарбияланат. Мындай жоопкерчилик жана ишеним жүктөлгөнүн ар бир тарбиялануучу аңдап түшүнүшү керек. Ошондуктан, окууга терең көңүл буруп, дени сак, жогорку маданияттуу, оюу тунук, билеги күчтүү, билими терең жарандар тарбияланышы керек”, — деди Сариев.
Ошондой эле аскер лицейдин жетекчилигине окуу жайдын материалдык-техникалык базасына көңүл буруп, имаратындагы кемчиликтерди иретке келтирүүнү тапшырды.
