БИШКЕК, 14-окт. — Sputnik. Батыш өлкөлөр саясий көз караштарына байланыштуу кызматташуудан баш тартып, "Ислам мамлекети" террористик тобуна каршы коалиция түзүү жөнүндө маселени Россия менен олуттуу талкуулагандан оолактап жатканын РФ Тышкы иштер министри Сергей Лавров билдирди.
Лавров эске салгандай, Россия БУУнун Коопсуздук кеңешинин төрагасы катары өткөн айда тышкы иштер министрликтеринин деңгээлинде террордук коркунучка каршы күрөшкө арналган отурум өткөргөн эле.
"Ал отурумдун жыйынтыктары боюнча биз азыр кеп кылып жаткан Коопсуздук кеңештин башчылыгы астында коалиция түзүүгө багытталган резолюция долбоорун киргизгенбиз. Ал БУУнун Уставынын, Коопсуздук кеңештин чечимдеринин негизинде, аскер аракеттери аймагында жүрө турган өлкөлөрдүн макулдугу менен жана мындай өз ара жөндөштүрүлгөн иштин жүрүшү тууралуу Коопсуздук кеңешке үзгүлтүксүз маалымат берип туруу аркылуу ишке ашырылмак", — деди министр НТВ телеканалына берген маегинде.
Ал мындай көз караш менен талашып-тартышуу өтө кыйын, "бирок биздин батыш өнөктөштөрүбүз расмий эмес жолугушууларда долбоордо баары туура жазылганына карабай, бул маселе боюнча кызматташа албай турганын билдирип, азырынча олуттуу талкуудан оолактап жатышат" деп кошумчалады.
"Ал эми саясий көз караштары кайсылар дейсиздер? Ирак өкмөтү сураган соң, Ирактагы террористер менен күрөшү үчүн легитимдүү, бирок Сирияда ошондой эле иш алып баруу укугу жок коалиция түзүлүп калган. Болгону эле ушул. Ошон үчүн бизге эч кандай Коопсуздук кеңешинни кереги жок, өзүбүз эле чечип алабыз деп жатышат. Кеңеште болсо Россия, Кытай, Венесуэла жана дайыма эле башын ийип баарына макул боло бербеген дагы башка өлкөлөр бар да. Мунун арты жакшы болбойт", — деди Лавров.
