БИШКЕК, 10-окт. — Sputnik. Баткен райондук ИИБ каракчылык менен алектенген 16 жаштан 21 жашка чейинки балдардын тобун кармаганын ИИМдин маалымат кызматы билдирди.
18 Аяк оона 2015, 17:45
Маалыматка ылайык, үстүбүздөгү жылдын 19-сентябрына караган түнү белгисиз жарандар аталган райондун Аксай аймагынын 77 жаштагы тургундун үйүнө кирип барып, бычак менен коркутуп акча талап кылышкан. Андан соң карыяны ур-токмокко алып, үйдү тинтишкен. Кожоюндун 20 миң сомун алгандан кийин из суутуп кетишкен.
Бул факт боюнча кылмыш жаза кодексинин "Каракчылык" беренесинин негизинде кылмыш иши козголгон.
Иликтөө иштеринин натыйжасында кийинки күнү 16-21 жаштагы Баткен облусунун төрт тургуну кармалган. Соттун чечими менен алар камакка алынды.
Учурда тергөө иштери жүрүп жатат.
