БИШКЕК, 1-окт. — Sputnik. Премьер-министр Темир Сариев Кыргыз Улуттук филармониясынын концерттик сезонунyн ачылышына катышып, өкмөттүн атынан филармониянын чыгармачыл жамаатына автобус удаба кылды. Андан сырткары, маданий кызматкерлердин айлык акысын жогорулатуу маселеси караларын айтты.
Сариев салтанаттын жүрүшүндө Улуттук филармониянын кыргыз маданиятындагы мааниси чоң экендигин белгиледи.
"Сексен жылдан бери ата-бабалардын маданий мурасын сактап, муундан муунга өткөрүп жана жайылтып келе жатасыздар. Бул аралыкта филармониянын сахнасында миңдеген улуттук таланттардын маданият дүйнөсүндө тушоосу кесилди, кайталангыс өнөргө ээ кыргыз аттуу улутту бүт дүйнө тааныды", — деди Сариев.
Сариев буга чейин өкмөттүн 2020-жылга дейре маданиятты өнүктүрүү программасын иштеп чыгуу тапшырмасы Маданият, маалымат жана туризм министрлигине берилгенин эскертип, аталган министрликке стратегияны тез арада бүткөрүү милдетин койду.
"Программада кыргыз музыкасынын корифейлеринин бири Асанхан Жумакматов баштаган кыргыздын нукура ыр-күүлөрүн оркестрдин ыргагына салуу аркылуу эл аралык маданий аренага чыгаруу ишин колго алуубуз керек", — деди өкмөт башчысы.
Ал улуттук маданияттын уюткулуу очогу катары Улуттук филармония жер-жерлердеги театрлар менен маданий жайларга бардык жагынан үлгү болушу керектигин белгиледи.
