БИШКЕК, 30-сен. — Sputnik. КРдин Мамлекеттик чек ара кызматынын маалыматына ылайык, чатак кыргыз-өзбек чек арачыларынын жана Жаңы-Жер айылынын катышуусунда болгон.
Чек ара кызматынын берген маалыматында, 28-сентябрында Өзбекстандын Улуттук коопсуздук кызматынын Мамлекеттик чек араны кайтаруу комитетинин аскери чек ара мыйзамдарын бузуп, Кыргызстандын аймагына 10 метрдей ичкери кирип келгенде аны жергиликтүү эл кармап алгандыгы кабарланат.
Чыр чыккан жерге КРдин Айдаркен чек ара отрядынын "Кадамжай" заставасынын жоокерлери дароо жетип келип, жаракат алган эки тараптын тең адамдарына медициналык биринчи жардам көрсөткөн. Ушул эле күнү кыргыз-өзбек чек ара ведомстволорунун өкүлдөрүнүн жолугушуусунда, кыргыз тарап коңшулардын мыйзам бузган аракеттерин айтып, чек арачыны мекенине өткөрүп берген.
Кыргызстан менен Өзбекстандын чек ара аймагында чатак көп чыгат. Мунун себеби аймактарда чек ара тилкелеринде талаш жерлердин көптүгү жана тактоо иштеринин толук аягына чыга электиги.
