Маматалиев: кыргыз өкмөтү Аскаров боюнча сот чечиминин адилеттүүлүгүнөн күмөн санабайт

БИШКЕК, 26-сен. — Sputnik. Кыргыз өкмөтү сот тарабынан кабыл алынган чечимдердин акыйкаттуулугунан күмөн санабай турганын вице-премьер Абдырахман Маматалиев Адам укугу боюнча федерациянын президенти Карим Лахиджи менен жолугушуу учурунда билдирди.

Анын айтымында, Кыргызстан учурда 77 эл аралык аймактык жана интеграциялык уюмдардын, 20 эл аралык келишим органдарынын мүчөсү. Мындан тышкары, өлкөнүн аймагында адам укугун коргоо менен алектенген бир катар уюмдар иш алып барат.

Муну менен бирге вице-премьер Кыргызстандын бардык саясий уюмдары парламенттик демократияны өнүктүрүүгө, ушул багыттагы саясий реформаларды жапырт колдоого алышканын белгиледи.

"Бүгүнкү күнү Кыргызстанга парламенттик шайлоого көз салуу үчүн 33дөн ашуун чет элдик байкоочу келди", — деп билдирди Маматалиев.

Өз кезегинде Карим Лахиджи Кыргызстан бийлигинин бейөкмөт жана коммерциялык эмес уюмдар менен кызматташуусу үчүн ыраазычылык билдирди. 

Мындан тышкары, 2010-жылдын июнь окуяларында массалык башаламандыкты уюштуруп, милиционердин өмүрүнө забын болгон Алимжан Аскаровдун өмүр бою эркинен ажыратуу жазасын жана Жогорку Кеңештин бейөкмөт уюмдарды чет элдик агент деп таануу мыйзам долбоорун кайра карап чыгууну сунуштады.

Маматалиев Баш мыйзамга ылайык, соттордун чечими баары бирдей деңгээлде аткарылышы керектигин белгиледи.

"Кыргыз өкмөтү соттун чечиминин адилеттүүлүгүнөн күмөн санабайт. Аскаровдун ишине саясий боёк сүртпөстөн, аны кылмыш иштин чегинен кароого чакырам. Ал эми эгер Жогорку Кеңеш бейөкмөт уюмдарды чет элдик уюм деп таанып, мыйзам чегинде беките турган болсо, аткаруу бийлиги катары өкмөт аны кабыл алууга мажбур болот", — деди вице-премьер.

Жолугушуу соңунда Маматалиев Лахиджиге ден соолук каалап, адам укугу боюнча кызматташуу үзүрлүү боло турганына ишеним артты.