БИШКЕК, 23-сен. — Sputnik. Баалуу металл рыногунун ишин жөнөкөйлөтүү зергерлик тармагынын мыйзамдашуусуна жана анын өнүгүшүнө өбөлгө боло турганын вице-премьер Валерий Диль билдирди.
Маалыматка ылайык, бүгүн, 23-сентябрда "Кыргызалтын" ишканасын өнүктүрүүгө арналган жыйын болуп өттү.
Вице-премьердин айтымында, "Кыргызалтын" ишканасынын бардык активин ревизиядан өткөрүп, иш жөнүн так билүү зарыл.
"Менеджменттин негизги милдети — ишкананын кирешесин көбөйтүүгө аракеттерди көрүү. Бул үчүн мамлекет тарабынан баалуу металлдарды иштетүү укугу үчүн жарыяланган сынактарга активдүү катышуу зарыл. Мында конкурстук комиссияга конкреттүү инвестициялык сунуштар менен бекитилген даяр маалымдамалар жөнөтүлүш керек", — деди Диль.
Жыйын жүрүшүндө өлкөдөгү зергерлик тармагынын абалы талкууланды. Вице-премьер чийки затты алып келүүнүн мыйзамдаштырылбаганынан улам көптөгөн зер ишканалары көмүскө иштеп жатканын белгиледи. Анын айтымында, бүгүнкү күндө зергерлер жылына эки тонна алтын жана үч тонна күмүш пайдаланат.
"Зергерлик тармакты мыйзамдаштырып, чийки зат менен тийиштүү көлөмдө камсыз болуу маселесин чечүү керек. Бул тармактын маанилүүлүгүн эске алып, баалуу металл рыногунун ишин жөнөкөйлөштүрүү үчүн укук-ченемдик базаны анализдөө боюнча жумушчу топ түзүлөт", — деди чиновник.
Диль зергерлер үчүн бардык ыңгайлуу шарттарды түзүп берүү чет элдик инвесторлордун кызыгуусун жаратарын белгиледи.
