БИШКЕК, 22-сен. — Sputnik. Мамлекет дыйкандар менен фермерлерди бардык жагынан колдой турганын президент Алмазбек Атамбаев Ысык-Көл облусуна болгон иш сапары учурунда билдирди.
Мамлекет башчы айыл чарба тармагын өнүктүрүү боюнча жасалып жаткан иштер тууралуу маалымат берди. Анын айтымында, учурда бийлик реалдуу жыйынтыкка жетүү үчүн айыл чарба саясатын кайра карап чыгууда.
"Мындан улам Кыргызстандын ЕАЭБге кошулуусу Ысык-Көл облусу жана жалпы республика үчүн жаңы мүмкүнчүлүктөрдү ачат. Мамлекет өз кезегинде дыйкан менен фермерлерге бардык жагынан колдоо көрсөтүүгө, анын ичинде төмөнкү пайыздык үстөк менен насыя берүүгө даяр", — деди президент.
Андан тышкары, президент энергетикалык жана транспорттук тармактардагы ишке ашырылып жаткан ири долбоорлорго, ошондой эле Кыргызстандын Куралдуу күчтөрүндөгү реформаларга токтолду.
Өлкө башчы парламенттик шайлоого да токтолду.
"Мамлекет таза жана ачык шайлоо өткөрүү үчүн бардык чараларды көрдү. Ар бириңер өз келечегиңер үчүн жоопкерчиликти моюнга алып, таза абийир менен татыктуулар үчүн добуш бересиздер деп ишенем. Бийликти эл өзү тандап алууга тийиш", — деди президент.
Атамбаевдин иш сапары Чолпон-Ата шаарында уланат. Эртең, 23-сентябрда мамлекет башчы Чолпон-Ата, Балыкчы шаарларынын жана Ысык-Көл районунун активи жана коомчулугу менен жолугушууларды өткөрөт.
