БИШКЕК, 22-сен. — Sputnik. Ысык-Көлдү айланта курулган унаа жолу жакын арада капиталдык ремонттон өтө турганын президент Алмазбек Атамбаев Түп, Тоң, Ак-Суу, Жети-Өгүз райондору жана Каракол шаарынын эли менен жолугушуу учурунда билдирди.
Суроо-жооп иретинде өткөн жолугушуу учурунда президент эмдиги жылы Чолпон-Атада түрк тилдүү мамлекеттердин кызматташуу кеңешинин саммити жана Дүйнөлүк көчмөндөр оюндары өтө турганын белгиледи.
Мындан тышкары өлкө башчы аталган облустагы ири инфраструктуралык долбоорлордун ишке ашуусу тууралуу кенен айтып берди. Анын айтымында, жакын арада Балыкчы — Чолпон-Ата унаа жолу толугу менен оңдолуп, көлдү айланта курулган жол капиталдык ремонттон өтөт.
"Алдыдагы эки жыл ичинде Чолпон-Ата менен Алматы шаарларын бириктире турган трассанын курулушу соңуна чыгат. Бул жол туристтик тармактын өнүгүшүнө жана экономиканын башка тармактарын активдештирүүгө өбөлгө болот", — деди президент.
Атамбаевдин Ысык-Көл облусуна болгон иш сапары 23-сентябрда аяктайт.
