БИШКЕК, 20-сен. — Sputnik. Жогорку Кеңештин V чакырылышынын депутаттары парламенттин жаңы курамы келгенге чейин айлык ала беришет. Бул туурасында ЖКнын малымат кызматы билдирди.
Сентябрь айында спикер Жээнбеков депутаттарга Жогорку Кеңештин VI чакырылышынын иши башталгыча пленардык отурумдарды алып салууну, бирок комитеттер менен фракциянын иштерине сөзсүз катышуусун айткан.
Парламенттен "Депутаттын статусу" туурасындагы мыйзамда кийинки чакырылышка чейин эл өкүлдөрүнө айлык акыны төлөп туруу каралгандыгын айтышты.
"Баш мыйзамдын 71-беренесинде парламенттин ыйгарым укугу келерки чакырылыштын депутаттары келген күндөн тарта токтой тургандыгы жазылган. Андыктан, депутаттарга айлык акы төлөбөй коюуга негиз жок. Алар азыр комитеттерде, фракцияларда иштеп, айлык акысы жүрүп жатат",— деп билдирди парламенттин маалымат кызматы.
Учурдагы 120 депутаттын 92и Жогорку Кеңештин келерки чакырылышына депутат болууга аттанган.
