БИШКЕК, 17-сен. – Sputnik. Белоруссиянын ички иштер министрлиги кыргызстандык криминалдык авторитети Алмамбет Анапияевдин өлүмүнө күбө болгон адамдын аты-жөнүн тактоого жардам берүү өтүнүчү менен жарандарга кайрылды.
2015-жылдын феварль айында Минск шаарында унаанын багаж бөлүмүнөн криминалдык авторитет Алмамбет Анапияевдин сөөгү табылган. Ал АКШнын атайы кызматтарынын версиясы боюнча мурунку СССРден чыккан криминалдык топтун мүчөсү болгон. Аталган факт боюнча кылмыш иши козголгон.
ИИМ киши өлтүрүүгө күбө болушу мүмкүн делген адамдын сүрөтүн жайылткан. Милиция ал адам кылмыштын чоо-жайын билиши мүмкүн деп эсептейт. Болжолдуу күбө боюнча маалымат билгендер 8-017-218-79-35; 8-029-232-63-05; 8-029-623-66-70 телефону аркылуу кабарласа болот.
Анапияевдин сөөгү табылгандан кийин КР ИИМдеги булак кылмышка шектелип эки жаран кармалганын билдирген. Бирөөсү "Манас" эл аралык аэропортунан кармалса, экинчиси Минск шаарынан колго түшкөн. Белоруссиянын тергөө комитети Sputnik агенттигине аталган кылмыш иши боюнча кимдир бирөөнүн кармалганы тууралуу расмий маалымат түшпөгөнүн билдирген.
Кыргызстандын ИИМнин маалыматы боюнча, кримавторитеттин өлүмүнө күбө болгон Гүлжигит Абилазизов учурда мекеменин коргоосуна алынган. Анын адвокаты тергөөгө Абилазизов тактык киргизиши мүмкүн деп эсептейт.
Муну менен бирге бир катар кыргызстандык маалымат каражаттары кылмышка мурунку президент Бакиевдин бир тууганынын тиешеси бар экендиги тууралуу жазып чыгышкан. Буга байланыштуу президент Алмазбек Атамбаев Белоруссия бийлигине өлкөнүн экс-жетекчисинин бир тууганын Кыргызстандын укук коргоо органдарына өткөрүп берүүгө чакырган.
