БИШКЕК, 23-фев.— Sputnik. Белоруссиянын Минск шаарында19-февралда машинанын багажынан табылган сөөк кыргызстандык Алмамбет Анапияевге таандык экени тастыкталды. Бул тууралуу Sputnik сайтынын кабарчысына анын адвокаты Жыргалбек Бабаев билдирди.
Анын айтымында, Минск шаарына учуп барган байкеси, сөөк Анапияевдики экенин тастыктаган.
Бабаев маркумдун сөөгү Кыргызстанга Москва – Ош каттамы аркылуу 24-февралда алынып келе турганын билдирди.
Минск шаарынан криминалдык авторитет Анапияевди өлтүрүп кетишти деген маалыматтар 19-февраль күнү кечинде жергиликтүү ЖМКларга чыккан. Белоруссиянын укук коргоо органдары Либкнехт көчөсүнөн "Мерседес" үлгүсүндөгү автоунаанын багажынан адамдын сөөгү табылганын билдиришкен. Өлүктүн жанынан Шакиров Алмазбек Мийзамович деген жаранга берилген Россиянын паспорту табылган. Паспортко Анапияевдин сүрөтү чапталган болчу.
Аталган кылмыш иши боюнча Белоруссиянын башкы прокуратурасы да кылмыш ишин козгоп, сөөк кимге таандык экенин аныктай тургандыктарын билдирген болчу.
