БИШКЕК, 12-сен. — Sputnik. Тажик чек арачылары кыргызстандык жаранга карата курал колдонгонун Мамлекеттик чек ара кызматы билдирет.
Маалыматка ылайык, кыргызстандык жаран жүк ташуучу унаа менен чек арадан сызыгынан 10-15 метр алыстыкта кетип бара жаткан. Тажик чек арачылары айдоочудан машинаны токтотуусун талап кылышкан. Ага баш ийбей койгон кыргызстандык жаранга карата курал колдонулуп, сол жамбашына ок тийген.
Окуя болгон жерге келген кыргызстандык чек арачылар жабыркаган адамга биринчи жардам көрсөтүп, Лейлектин аймактык ооруканасына жеткиришкен. Учурда ок жеген адамдын абалы канааттандырарлык экени айтылууда.
Бүгүн, 12-сентябрда, Кыргызстан менен Тажикстандын Чек ара кызматтарынын өкүлдөрү жолугуп, кыргыз тарап тажик чек арачыларынын аракети мыйзамсыз болгонун далилдеп берди. Коңшу мамлекеттин чек арачылары буга макул болушту.
Учурда окуянын чоо-жайы иликтенип жатат.
