БИШКЕК, 10-сен. — Sputnik. Кыргызстан менен Казакстандын Чек ара кызматкерлери мамлекеттик чек араны абадан бирге көзөмөлдөй турганын аталган мекеме билдирди.
Маалыматка ылайык, 9-сентябрда Алматы шаарында Кыргызстандын Мамлекеттик чек ара кызматынын төрагасы Райимберди Дүйшөнбиев Казакстандын Улуттук коопсуздук боюнча мамлекеттик кызмат жетекчисинин орун басары Дархан Дильманов менен жолукту.
Сүйлөшүүлөрдүн жыйынтыгы менен мекемелердин аскердик кызматташуусу, кыргыз-казак чек арасын абадан бирге көзөмөлдөө жөнүндө макулдашылды. Ага ылайык, 2016-жылдын биринчи жарымында чек ара боюнча окуу өткөрүү пландаштырылды.
Чек араларды абадан көзөмөлдөө үчүн учуу графиги кийинчерээк белгилүү болот. Мындан тышкары, тараптар кыргыз чек арачылары Казакстандын аскердик окуу жайларынан акысыз билим алуусу тууралуу маселени карашмай болду.
