БИШКЕК, 9-сен. — Sputnik. Кыргыз жана кытай чек арачылары аймактарды чалгындоо боюнча бирдиктүү иш-аракеттерди көрө турганын Мамлекеттик чек ара кызматы билдирди.
Жолугушуу "Чек ара отряддарынын ортосунда достук мамилелерди түзүү жана чек ара коопсуздугун сактоо" боюнча кызматташуу протоколунун алкагында жүрдү.
Иш-чара учурунда эки өлкөнүн чек арачылары 2015-жылдын биринчи жарымындагы биргелешкен иш-аракеттердин жыйынтыгын чыгарып, мамлекеттик чек арадагы абал тууралуу маалымат алмашуунун натыйжалуулугун белгилешти.
"Эл аралык терроризмге каршы биргелешип күрөшүүгө өзгөчө көңүл бурулду. Мындан тышкары, чек ара аймактарын чалгындоо боюнча бирдиктүү чараларды көрүү макулдашылды. Жолугушуу учурунда чек аралык байланыштын чек ара заставалары – чек ара отряддары – мекеме жетекчилери үч деңгээлдүү тартибинин натыйжалуулугу белгиленди", — деп айтылат билдирүүдө.
Иш-чаранын соңунда Кыргызстан менен Кытайдын чек ара өкүлдөрү жолугушуу тууралуу протоколго кол коюшту.
