БИШКЕК, 10-сен. — Sputnik. Ички иштер министрлиги унаа уурдоо, жол кырсыгы жана андан каза тапкандардын саны көбөйүп жатышына саясий ишмер Өмүрбек Бабановду күнөөлүү деп эсептейт.
Министрлик "Республика – Ата-Журт" партиясынын теңтөрагасы, экс-премьер-министр Өмүрбек Бабанов шайлоочулардын алдында сүйлөп жатып, "эгер инспекторлор чогултулган айып пулду өлкө казынасына төксө, киреше көлөмү кыйла жогору болмок" деп айткан.
"Мында жылына бир миллиард сом деп Бабанов апыртмалуу сандарды келтирди. Шайлоо алдында жеке кадыр-баркы үчүн укук коргоо органдарынын ишин жокко чыгарган сөздөр көп айтылганы өкүнүчтүү", — деп айтылат билдирүүдө.
ИИМ өкмөттүн башында Бабанов турганда милдеттүү документтердин катарынан ишеним кат, техникалык кароо жана Жол кайгуул кызматынын стационардык посттору алып салынганын эскертет.
"Мындан улам 2012-жылы болгон жол кырсыгы андан бир жыл мурункуга караганда 20,6 пайызга өскөн, кырсыктын кесепетинен жабыркаган жана каза тапкандар көбөйгөн. Ишеним каттын жоюлушу менен унааларды издөө кыйындап, авто уурдоо көбөйгөн. Милдеттүү түрдө техникалык текшерүүнүн алынышы салык көлөмүнүн азайышына алып келген. Мындан тышкары, жол кырсыгы арбыган," — дейт министрлик.
Ички иштер министрлиги жарандардын укугун коргоп, саясаттан тыш болуп келгенин белгилейт. Ушуга байланыштуу үгүт иштери убагында саясий партияларга милицияны саясий оюндарга аралаштырбоону эскертет.
