Президенттин аппараты Ташиевдин айткандарын "ыплас ыкма" деп атады

БИШКЕК, 7-сен. — Sputnik. Президенттин аппараты экс-депутат Камчыбек Ташиевдин шайлоочулар алдында сүйлөгөн сөзүн боюнча билдирүү таратты.

Өлкө башчысынын маалымат кызматы билдиргендей, мурунку эл өкүлү, "Республика – Ата-Журт" партиясынан депутаттыкка талапкер Камчыбек Ташиев Ош шаарында эл алдында сүйлөп жатып Аламүдүн жана Сокулук райондорунда кошумча шайлоо участкалары түзүлүп жаткандыгы тууралуу чындыкка дал келбеген маалымат берген. 

Ташиевдин айтканы боюнча, ал участкалар президенттин кичи мекенинде "бийлик партиясынын" электоратын көбөйтүү үчүн түзүлүп жатат. 

"Мындай билдирүү коомчулукка туура эмес ойду калыптандырып, аймакта бөлүп-жаруу аракети таасын көрүнүп турат", — деп айтылат президенттин аппаратынын маалыматында.

Муну менен бирге аппарат Борбордук шайлоо кызматынын кошумча шайлоо участкалары Бишкек жана Ош шаарларында гана түзүлгөн деген маалыматын келтирет. 

"Президент аппаратынын маалыматтык саясат бөлүмү кимдир бирөөлөрдүн, анын ичинде Ташиевдин да өлкө башчынын атын сатуусуна жол берилбей турганын белгилейт", — деп айтылат билдирүүдө.

Аппарат "саясатчынын ыплас ойлору буга чейинки кандайдыр-бир кыйынчылыктар менен коштолуусу мүмкүн экенин, бирок бул дагы анын мындай аракетин актабай турганын" билдирет.

Президенттин аппараты "Республика – Ата-Журт" партиясын, ошондой эле шайлоого аттанган башка саясий уюмдарды саясий күрөштүн ыплас ыкмаларынан баш тартып, үгүт иштерин мыйзам чегинде таза өткөрүүгө чакырат.

Үгүт иштери 4-сентябрда башталып 3-октябрга чейин уланат. Ал эми парламенттик шайлоо 4-октябрда өтөт.