БИШКЕК, 10-сен. — Sputnik. "Кыргызпочтасы" мамлекеттик ишканасын чегинде почта банкын түзүү зарылдыгын вице-премьер-министр Валерий Диль карамагындагы мамлекеттик орган жетекчилеринин жыйынында билдирди.
Анын айтымында, жыл аягында мамлекеттик органдар тарабынан тармактык жана улуттук программалардын аткарылышы боюнча жыйынтыктоочу отчет түзүлөт. Аталган документ министрлер менен мекеме жетекчилеринин ишинин натыйжасын айгинелөөчү көрсөткүч болмокчу.
Вице-премьер Мамлекеттик мүлктү башкаруу фондунун аткарган иштерине токтолуп, мамлекеттик мүлктүн бирдиктүү реестрин түзүү жана активдерин баалоо зарылдыгын белгиледи.
"Мындан тышкары, "Кыргыз почтасы" мамлекеттик ишканасын реформалоо маселесин тездетүү менен анын алкагында почта банкын түзүү керек", — деди Диль.
Жыйындын соңунда вице-премьер-министр өнөр жайды өнүктүрүүнүн узак мөөнөттүү концепциясын жана аймактарды класстердик өнүктүрүү программаларын иштеп чыгууну тапшырды.
