БИШКЕК, 21-июль — Sputnik. Мамлекеттик активдерди ревизиядан өткөрүп, мамлекеттик ишканалардын жана мамлекеттин үлүшү бар акционердик коомдордун бирдиктүү реестрин түзүү зарыл экенин Мамлекеттик мүлктү башкаруу фондусунун (ММБФ) коллегиясында вице-премьер-министр Валерий Диль билдирди.
2015-жылдын биринчи жарым жылдыгынын жыйынтыгын чыгаруу боюнча ММБФнын коллегиясы болуп өттү.
Дилдин айтымында, фонддун негизги максаты мамлекеттик менчикти натыйжалуу башкаруу болуп саналат. Бирок, аталган фонд өз милдетин толук аткара албай жатат. Чиновник мындан улам мекеме реформалоого муктаж экенин белгиледи.
"Фонддун мамлекеттин кызыкчылыгына каршы чечимдерди кабыл алган учурлары кездешет. Мындан тышкары, мыйзамдык базадагы айрым кемчиликтерден арылуу мамлекеттик ишканаларда жана акционердик коомдордо болуп жаткан процесстерге таасир этүүгө мүмкүнчүлүк берет. Ал эми мамлекеттик менчикти башкаруунун өзүн тармактык блокторго бөлүү зарыл. Мында холдинг компаниясы системанын өзөгүн түзүп калат", — деди Диль.
"Бул адамдар кесипкөйлүгү менен айырмаланып, ишкананын өнүгүшүнө кызыкдар болушу кажет. Мүчөлүккө жөн гана жумушка муктаж адамдар келип калган учурлар арбын. Андыктан аларга айлык төлөбөстөн, бонустук системага өткөрүү керек. Мында ала турган айлыктын көлөмү ишкананын ишмердүүлүгүнөн көз каранды болот", — деди чиновник.
Диль жакын арада менчиктештириле турган "Альфа-телеком" компаниясына токтолду.
"Менчиктештирүү боюнча чечим терең талдангандан кийин кабыл алынган. Учурда телекоммуникация рыногу тездин менен өнүгүүдө. Инвестиция талап кылынган жаңы технологиялар ишке кирип жатат. Эгер ишкана тийиштүү деңгээлде иштетилбесе, рыноктогу ордун жоготуп, кирешеси төмөндөйт. Компанияны иштетүүгө даяр инвесторлор чыгып жатат. Учурдан пайдаланып, "Альфа-телеком" компаниясын пайдалуу сатып жиберүү керек", — деди вице-премьер.
Коллегиянын жыйынтыгы менен Диль мамлекеттин үлүшү бар компаниялардын ишмердүүлүгүн текшерүүдөн өткөрүп, "Чакан ГЭС" ишканасынын курамына кирген гидроэлектростанцияларды оңдоо боюнча программа иштеп чыгуу тапшырмасын берди.
