БИШКЕК, 10-сен. — Sputnik. Директорлор кеңишинин чогулушунда "Түндүкэлектро" ишканасынын жетекчиси болуп кайрадан Искендер Кадыркулов дайындалды. Бул тууралуу аталган мекеме билдирет.
Кадыркулов буга чейин да аталган ишкананы жетектеп келген. 2012-жылы "Түндүкэлектро" ишканасынын директорлор кеңеши аны Мамлекеттик мүлктү башкаруу фондунун сунушу менен кызматынан алган. Ушу кезге чейин жетекчилик милдетти "Түндүкэлектро" ишканасынын техникалык директору Кубанычбек Турдубаев аткарып келген.
Учурда анын ордуна директорлор кеңешинин чечими менен Аскар Эшимбеков дайындалды.
"Түндүкэлектро" ачык акционердик коому Кыргызстанды энергия менен камсыз кылган алдыңкы компания. Ишкана өзүн өзү актоо принциби менен Чүй, Талас облустарына жана Бишкек шаарында электрэнергияны бөлүштүрүп жана сатат.
Жыл башына карата ишкананын тейлөөсүндө 25 миң 991 юридикалык жак жана 512миң 987 абонент катталган. Компаниянын 80,49 пайыз акциясына Мамлекеттик мүлктү башкаруу фонду ээлик кылат. 13,16 пайызы Соцфонддун карамагында, ал эми калган үлүшү юридикалык жана жеке жактардын ээлигинде турат.
