БИШКЕК, 28-авг. — Sputnik. Сегиз жыл мурун Казакстанга кулчулукка сатылып кеткен кыргызстандык аял качып чыгып, КР Өзгөчө кырдаалдар министрлиги менен байланышканын аталган мекеме билдирди.
Аялдын айтымында, мындан сегиз жыл мурун Казакстанга кулчулукка сатылып, эч ким барбаган ээн талаада кой кайтарып жүргөн. Жакында качып чыгып, Алматыга жакын жерден телефон таап, Кыргызстандын Өзгөчө кырдаалдар министрлиги менен байланышууга аракет кылган.
"Нөөмөтчүнүн жасаган айла-аракети менен аялдын ким экени такталып, ал Оштун Ноокен районунан мындан сегиз жыл мурда чыгып кеткен бойдон дайынсыз жүргөндүгү белгилүү болгон", — деп айтылат билдирүүдө.
ӨКМ кызматкери аялды ИИМ жана ТИМ кызматкерлери менен байланыштырган.
"Учурда аны Кыргызстанга алып келүү аракеттери көрүлүүдө. Аялдын аты-жөнү коопсуздук үчүн азырынча аталбайт", — дейт ӨКМ өкүлү.
Мекеме аялдын Казакстанга кошо кеткен колундагы наристеси бүгүн сегизге чыгып, мектепке да барбай калгандыгын белгилейт.
