БИШКЕК, 28-авг. — Sputnik. Казакстанга кулчулукка сатылып, сегиз жылдан бери Кыргызстанга келе албай жүргөн аялдын ким экени такталганын ӨКМ билдирет.
Маалыматка ылайык, кулчулуктан качып чыккан Бактыгүл Кошонова Ош облусунун Араван районундагы Төө-Моюн айыл округуна караштуу Ынтымак айылынын тургуну болгон. Анын айтымында, 2008-жылдын 25-июнунда 17 адамды белгисиз адамдар алдап Казакстанга алып барып, сатып жиберишкен.
"Ошол мезгилде Кошонованын колунда бир жаштагы баласы бар болчу. Келин апасы каза болгондон кийин үйүнөн качып кеткендигин билдирди", — деп айтылат билдирүүдө.
Буга чейин айтылгандай, ыкчам нөөмөтчү Бекзатбек Казаков жогорудагы маалыматтарды тактоо максатында Араван районунун Төө-Моюн айыл өкмөтүнүн башчысы Санжарбек Абдуллаев менен телефон аркылуу байланышып, чындыгында эле Кошоновдор ошол айылда бар экендигин тактаган.
"Казаков аймактын башчысынан Кошоновдордун үйүнө барып, маалыматты тактап берүүсүн айыл суранган. Келиндин айтымында, үйдө атасы Абилбек Кошонов жана иниси Калил Кошонов болушу мүмкүн эле. Бирок алар жайлоого кеткендиктен, айыл аймактын кызматкерлери үйүнөн эч кимди таба алышкан эмес", — деп айтылат билдирүүдө.
Кулчулуктан качып чыккан Кошонова тууралуу Казаакстандын Алматы шаарындагы Консулдугуна жана КРдин Ички иштер министрлигине маалымат берилди.
Маалыматта Өзгөчө кырдаалдар министри Кубатбек Боронов бул окуянын териштирилишин жеке көзөмөлүнө алганы айтылат. Учурда маалыматтар такталып жатат.
