БИШКЕК, 23-авг. — Sputnik. Кыргызстандын Коргоо министрлиги аскерге милдеттүү жана ага чакырлуучу жарандардын электрондук эсебин алууну демилгелеп жатат. Тийиштүү мыйзам долбоору өкмөттүн расмий сайтына жарыяланды.
Коргоо министрлиги билдиргендей, мындай аракет ИИМ, УКМК, Чек ара кызматы, Бажы жана Каттоо кызматтарынын ортосунда аскердик эсепке туруудан жана аскердик милдетти өтөөдөн баш тарткан жарандар менен иштешүүнү жаңы деңгээлге чыгарат.
Муну менен бирге электрондук эсеп системасын ишке киргизүү менен адамдын аты-жөнүн тастыктаган аскердик документтерди улам бир баскыч менен электрондук тастыктамага өткөрүүгө шарт түзүлөт.
Бүгүнкү күндө аскер адамдары, аскерге милдеттүү жана ага чакырылуучу жарандар үч документ — аскердик эсепке алынганы тууралуу, альтернативалык кызмат өтөө боюнча тастыктама жана аскердик билет алат.
