БИШКЕК, 20-авг. — Sputnik. Вице-премьер-министр Абдырахман Маматалиев Жаза аткаруу мамлекеттик кызматынын төрагасы Алик Мамыркуловдун Пенитенциардык системаны жакшыртуу жаатында 2012-2016-жылдар үчүн каралган Улуттук стратегия боюнча отчетун укту. Аны аткаруудагы бир топ иш-чаралар кечигип жасалгандыгын айткан вице-премьер-министр, бул мурдагы жетекчинин кемчилиги деп баалады.
"Жаза аткаруу мамлекеттик кызматынын жетекчиси жаңы келгендигин эске алсак, Пенитенциардык системаны жакшыртуу жаатында 2012-2016-жылдар үчүн Улуттук стратегияда каралган иштердин аткарылбай калышы мурдагы жетекчинин кемчилиги", — деди Маматалиев.
Талкуунун жыйынтыгында Маматалиев ведомствонун ишин жетишерлик эмес деп баалап, мурдагы жетекчи тарабынан ишти алып барууда бир топ калпыстыктар кетирилгендигин айтты.
Вице-премьер-министр Жаза аткаруу кызматынын жетекчилигине аталган стратегияны өз учурунда аткаруу үчүн зарыл иштерди жасоону тапшырды.
