БИШКЕК, 13-авг. — Sputnik. Кыргызстанга сырттан алынып келген балыктардын сапаты шектенүү экенин Айыл чарба жана мелиорация министрлигинин Балык чарбасы департаментинин жетекчиси Самарбек Күчүков билдирди.
Анын айтымында, эл сатып алып жаткан балыктын 80 пайызы импорттолот.
"Сапаты шек жараткан балыктар да бар. Албетте, алар текшерилет, ошентсе да, контрабандалык жол менен алынып келген селедкалар шек жаратат", — деди ал.
Күчүков Кыргызстан шектүү делген продукциядан өзүн толук коргой албай турганын кошумчалады.
"Мисалы, иштетилген балыктын калдыктары консерваланып, үчүнчү өлкөлөргө жиберилет. Мындай продукцияны жеген ден соолукка зыян, ууланууга алып келет", — деди Күчүков.
Андыктан, буга жол бербөө үчүн, Күчүков балыктан жасалган продукцияларды тандоону жана аны колдонуу ыкмаларын үйрөнүү керектигин белгилейт.
