БИШКЕК, 12-авг. — Sputnik. Жол кайгуул кызматынын инспекторлору Боом капчыгайында автоунааларды 5-10дон өткөрө баштады. Бул туурасында ӨКМдин маалымат кызматы билдирди.
Азыр Транспорт жана байланыш министрлигинин күчү менен түшкөн таштардан, шагылдан жолду тазалоо иштери жүрүп жатат.
Жүргүнчүлөр Боом капчыгайым аркылуу өткөн Бишкек – Балыкчы унаа жолунун 131-чакырымында тоодон кум, шагыл эшилип түшүп, жолду тосуп калгандыктан, автотыгын пайда болгонун билдиришкен. Анын кесепетинен, каттам буулуп калган. Алдын ала алынган маалыматтарда, түшкөн кум менен шагылдын көлөмү 2000 чарчы чакырым.
Окуя болгон жерде Чүй жана Ысык-Көл облусунун куткаруучуларынын эки бригадасы иштеп, автотыгында калган жүргүнчүлөр менен айдоочуларга биринчи медициналык жардамды көрсөтүүгө даяр турушат.
Ал аймакта учурда Өзгөчө кырдаалдар министри Кубатбек Боронов жүрөт.
