БИШКЕК, 4-авг. — Sputnik. Кыргызстандын Куралдуу күчтөрүнүн Генералдык штабынын аскерлери Москвада өткөн КМШ аскерлеринин алгачкы аскердик-спорт оюндарынан 10 коло медаль менен кайтып келгенин аталган мекеменин маалымат кызматы билдирет.
Оюндар 24-июлдан 1- августка чейин Улуу Жеңиштин 70 жылдыгын белгилөөнүн алкагында Москванын ЦСКА клубунда өттү.
Кыргызстандан аталган оюндарга 27 спортчу катышып, мелдештин беш түрү — жеңил атлетика, штаттык жана табелдик куралдан атуу, оордук көтөрүү, дзюдо жана мушташ боюнча өз өнөрлөрүн көрсөтүштү.
Натыйжада кыргызстандык спортчулар тогуз жеке жана бир командалык коло байгени багындырышты.
Оюндардын жабылуу аземинде Кыргызстандын КК БШ аскердик даярдык бөлүмүнүн башчысы Дүйшөнкул Исакуловго "аскердик шериктештикти бекемдөөгө кошкон салымы үчүн" медалы тапшырылды.
